今日星期三，冇夜馬，事關馬季已結束，要等到九月先至再有。冇馬跑，今晚去邊，惘然若有所失，但亦即刻俾老友約咗去出席飯局，一樣唔得閒。
唔好以為啲馬迷大鋪癮，事實上，現在香港愈來愈缺少標準馬迷，今季投注總額少咗六七十億元，政府稅收就減少七至八億，打擊松司長要消滅財赤嘅計劃。另一方面，馬會收入減少，捐款做慈善嘅能力大大削弱，有邊位善長仁翁肯填補善款嘅短缺呀？
馬迷減少，投注額降低係馬會難以解決嘅問題。投注額銳減，可以賴失業率高，經濟不景，人人憂柴憂米。馬迷人數減，就賴得乜呢？問題係馬迷年紀高齡化（社會學家話講老化，有歧視之嫌，講高齡化至啱聽。），年輕馬迷愈嚟愈少。左丁山經常在會員席出入，所見者，多熟口熟面，三十幾至六十幾歲嘅人就最多，二十零歲嘅馬迷，只會偶然見到一次半次，二十年後，你話兩個馬場去邊度搵觀眾？
點解年輕人唔入馬場呢？想來係足球吸引力高，年輕人唔講馬與波（上世紀五六十年代嘅消遣口號），只講波，馬會經營賭波之後，更多年輕人睇電視，唔入馬場，此亦是馬會搞賭波嘅弔詭之處。如果馬會刻意培養年輕馬迷，會俾道德派圍攻，夏佳理主席雖係橋王亦傷腦筋。