到咗月尾，又係各大車廠公布上一個月汽車製造、銷售及出口數據嘅時候，而今回最先公布嘅日本三菱車廠，雖然全球汽車生產及出口數量，均較去年同期有所下調，但日本本土銷量卻錄得4.2%升幅，表現實能令人感到滿意。
喺汽車製造方面，廠方上月喺位於日本本土嘅生產線，合共產製出54,920部（連商用車計算在內）新車，較去年同期上升多達11.6%；但受到海外生產線產量下跌9.7%影響（生產汽車數目為70,743部），而令全球產量較去年同期微跌1.5%。另外，汽車出口數目亦錄得較大嘅跌幅，若連商用車計算在內，三菱於五月份出口往其他地區嘅汽車只有21,247部，比2002年同期下跌11.7%。
但響日本本土銷售成績方面，卻令人感到滿意，皆因喺新款Grandis及Colt等車款熱賣潮推動下，若連商用車及迷你車款計算在內，合共售出多達23,972部新車，較2002年同期上升4.2%，就連三菱響日本本土市場嘅佔有率，亦因而錄得升幅呢！