政府七一送大禮有搞作，叫人擦一擦，擦靚香港。中獎者一世飲咖啡、一年無憂米和餐餐有正菜，甚至養你一個月。香港人過這個二○○三年的七一，忽然很有「二奶」幸福感，被政府這個大老闆包養，回歸溫柔窩懷抱，會自覺像一棵「正菜」多過似人。七一大遊行反廿三，不一定是你杯茶。各有前因，政府既然出手招攬，得切中實際需要，超越咖啡奶茶婆仔數。那末，送甚麼好呢？
一、送事後避孕丸！保安局強姦民意，通過廿三條，民意遭施暴，隨時搞大個肚爆大鑊。政府宜啟動事後避孕措施，斬草除根冇後顧之憂。二、送懵仔針，免費打足一世！打埋你的下一代！廿三條通過，唔懵一身孱。啪丸逃避現實，才能做人。如果懵仔針派晒，可以懵太沙士裝備頂上，穿上它，淨係記得洗手，轉移視線。三、計算機。廿三條這筆帳，計來計去都是令香港賠本兼夾蝕聲譽的劣作。政府惟有送出做過手腳的失禁計數機，無論用家點計，六四=廿三，七一亦是=廿三，連十五二十開晒都係廿三！香港變「袁木廿三之都」，管治易過乜。四是壓軸大獎，政府照顧埋你的來世，送廿三個浩園風水穴又點話！