早排政府攞咗約五百萬出嚟，準備搵班導演幫手拍抗炎宣傳短片，為市民打打氣，而參加今次拍攝嘅導演同紅星一律係收九百九十九蚊呢個公價，當係車馬費，其實一般參與拍攝嘅手足，都會將呢筆車馬費捐埋出嚟！
但係就真係冇諗到男仔頭女歌手拍完短片後竟嫌錢少，重走埋去某組織投訴，最離奇係呢個會又受理喎，重出面去交涉！
馮仁昭知道呢件事令到好多導演反感，因一早講明酬勞得咁多，如果參與嘅人覺得有問題係可以唔拍，冇人會勉強你，因為參與嘅人都係攞個心出嚟做善事，根本冇諗過為錢，呢位女歌手真係不知所謂。
新人王蓉真係得到唱片公司嘅寵幸，第一次出碟開發布會就喺尖沙嘴半島酒店，差唔多用咗六位數字金額，而一班商台高層，同埋MusicNation代表李進亦嚟捧場，王蓉梗係開心啦！喺接受訪問嗰陣，王蓉好識做，話李進係佢生命中最珍貴嘅男人，好彩李進結咗婚女又生埋，唔係又有排俾人講。
徐若瑄有日半夜三更打電話畀哈林庾澄慶，因為佢應承咗幫哈林填詞，有一晚佢突然靈感乍現，立刻興奮地打電話畀哈林，重叫哈林即刻唱埋畀佢聽。徐若瑄填詞叻，周杰倫、吳建豪、梁詠琪都爭住要搵佢幫手，哈林叫佢寫歌，佢即刻應承，因為哈林係佢讀書時嘅偶像，佢重話當時自己最大嘅夢想，就係嫁畀哈林！
蘇志威同老婆劉小慧噚日出席喺金鐘舉行嘅記招。問小慧有冇見到黎瑞恩個肚好大，會唔會教定佢湊女心得？小慧話：「係咩？冇睇到喎！就算肥四十磅都唔算勁，嗰時我重肥啦！至於話教路，唔使啦。」小慧重話唔會再追多個，因為𠵱家囡囡好生性，生多個唔生性就煩！
李連杰同太太利智日前喺美國出席《變形俠醫》首映，跟住就有報道話利智個女出咗世，不過利智老友方平噚日喺九龍塘出席佢監製部新片《忘不了》開鏡時就話，早幾日同利智通電話，佢都冇提過生女嘅事，所以方平話利智應該唔係有第二胎。
早排因為沙士問題而延期嘅台灣第十四屆金曲獎，已鐵定八月二號喺台大綜合體育館舉行，曾經話過如果得獎就除褲嘅陳奕迅，知道消息之後好開心，但佢八月份嘅期已經密晒，不過唱片公司會盡量幫佢度期出席。不過早排批評金曲獎造馬嘅陶喆，就肯定唔會出席，因為到時佢會喺美國錄新碟。
