月初先至話獲得獨立投資者洽購股份的新怡環球(1094)，前日公布業績大走樣後，噚日股價勁跌33%。小初炒過呢隻股並賺過錢，好彩聽經紀黃話，只係短炒冇長揸，噚日見到咁嘅情況，即刻打電話畀經紀黃致謝。
新怡前日公布中期業績，只係賺得516.9萬元，比去年同期勁跌71.8%，股價即刻有反應，噚日最低見過0.28元，收0.305元，跌33%，由於成交金額有成1070.6萬元，睇嚟真係有唔少人未落車。
小初慶幸自己走得快之餘，亦想問吓經紀黃點解咁有先見之明？經紀黃笑笑口話，皆因自己夠勤力做足功課，所以清楚一眾鞋股嘅情況。小初現時應該明白，點解新怡難與裕元（551）、信星（1070）同新灃（1223）相提並論。
經紀黃又話，現時大部份鞋股實在偏高，趁高沽貨錯唔到去邊。據聞就算正斗如信星，近日亦有外資行出報告，話股價升得太多，已經反映未來業績表現。
慕容小初