港股噚日再跌104點，收報9629，成交89.68億元。恒指過去5日累積跌幅逾400點，據聞好友的平倉盤已平得八八九九，調整應該近尾聲。
e莉莎話，市場一早憧憬美國會減息，但亦同時知道減息對刺激經濟冇作用，反而給市場一個訊息，就係美國經濟前景仍然唔理想，換言之議息結果無論係點，最終對金融市場所產生的效果，都係利淡為主。
市場傳出中國審計局最近嚴查企業帳目，其中深高速（548）亦成為被查對象，搞到唔少中資股應聲下滑，深高速股價更急跌10%。其實呢類抽查好正常，唔代表受查公司有問題，但被調查的公司如果真係有問題，則唔排除對中資股有不利影響及產生骨牌效應。
不過，噚日北京雙喜臨門，世衞不但撤銷北京旅遊警告，重剔除埋疫區之名。北京控股（392）、北辰（588）同首都機場（694）可能會炒上賀一賀。
華智控股（8065）今日掛牌，傳聞此股會挾長實（001）入股之勢於首日勁炒。其實此股有心炒上就一早預咗，不過是否炒得上，以及炒得靚唔靚，就真係要拭目以待。
華智上市共發售1.27億股，6600萬股是新股，6100萬股是舊股，全數配售，而其中74%股份配畀10名投資者，即係話公眾持股量相當集中。此外華智大股東又出口術，講明會轉讓4.99%股權畀長實。此股要炒上唔難，不過能否吸引散戶上車，還須看炒家資金和實力，若成交唔夠大，就真係好難搵人跟。
長實點石成金效應亦未必萬試萬靈，最近長和系旗下的長江生命科技（8222）與和記港陸（715）都開始回軟。
阿虎