全球熱賣嘅《哈利波特──鳳凰命令》，八方有朋友買咗一本睇睇吓，竟發現不少情節熟口熟面。話說呢集故事有一個新角色Umbridge教授，係一個又醜又惡嘅女人，佢嘅出現全因新立嘅惡法「第二十三條教育令」。
因為魔法部部長對霍格華茲魔法學校愈來愈不滿，於是立咗呢條「二十三條」，授權委任Umbridge教授進入學校做調查官，昅住校內人士有乜嘢異動，權力無限咁大，搞到哈利波特同班朋友仔好麻煩。
後來Umbridge教授自行立新法「二十四條」，宣布校內所有三人以上嘅組織、學會全部被解散，要有Umbridge嘅同意先可以重組。之後更立埋二十五條、二十六條等，進一步限制老師同學生嘅自由。
立法會議員李卓人噚日喺立法會叫晒所有同事、記者留意呢本書，話霍格華茲魔法學校簡直係香港二十三條惡法嘅翻版，書中嘅Umbridge隨時可以解散學會，同香港二十三條中禁制組織嘅「第八宗罪」有異曲同工之妙。八方睇睇吓啲情節又真係好似，唔知作者羅林靈感點嚟呢？
傳真︰2623-9278
電郵︰