「郁到基本權利，我哋要出聲」
Beyond籲Fans7.1上街咪做傻仔

Beyond前晚在紅館舉行最後一場演唱會，三子一向敢言，黃貫中更在舞台上公開呼籲在場近一萬名歌迷，參加七月一日反二十三條大遊行，獲台下觀眾報以熱烈掌聲支持。揚言「我哋唔係儍」的黃貫中，表示當天必定會參加遊行，更鼓勵大家要發表自己的意見。

香港搖滾班霸Beyond一連三場的「Beyond超越Live03II」演唱會，前晚在紅館曲終人散，全晚反應熱烈。而一向敢言的Beyond三子，前晚更在舞台上公開批評二十三條立法，又呼籲在場近一萬名歌迷七月一日上街支持反二十三條大遊行，用行動捍衞自己的權利。

有感而發：
我哋係小市民，梗係驚啦！
黃貫中（Paul）前晚在台上獨唱一曲《打不死》後，有感而發地說：「容許我講一句話，七月一號你哋得唔得閒呀？好似話有茶飲、有嘢送，重有錢袋落袋。有人問我會唔會去（指反二十三條立法大遊行），我梗係去啦，驚？我就唔驚，你哋驚，我唔怪得你哋，我哋係小市民，小市民梗係驚啦！但係我覺得有啲嘢郁到我哋基本權利時，我哋就要出聲。你係儍，我哋唔係儍。」
阿Paul說罷便唱出《聲音》一曲，全場觀眾均拍掌以示支持。獻唱後阿Paul再說：「講嘢唔得，但係阻止唔到我哋諗嘢。」

隨心支持：
想去就去，行吓街之嘛！
其後記者在慶功宴上問到阿Paul會否參加七月一日遊行，他說：「想去就去，大家隨心，行吓街之嘛，唔係犯法呀！我覺得人人都有得發表，如果自己唔爭取就冇得救，就算反對同支持都要去，我係鼓勵人發表意見，你都唔夠膽講自己個心，咁就係冇得救。」
而黃家強亦表示希望能抽空出席遊行，葉世榮則表示自己尚未了解清楚二十三條是甚麼，所以不想盲目支持，待他了解清楚後才考慮會否參加遊行。
此外，前晚除阿Paul發言外，最吸引歌迷的莫過於黃家強表演自摸舞蹈。家強在獨唱《昔日舞曲》時，不自覺地擺動身體，更將手慢慢向下移自摸下體，引來全場歌迷不停叫囂，但家強自己卻忍不住偷笑兼甩嘴。

家強自摸：
我摸下有冇甩拉鏈！
事後家強在慶功宴上被問到表演自摸時甩嘴一事時，他笑說：「幾好呀，冇乜事呀，唱Live就係有咁嘅好處，鍾意點唱就點唱。」而阿Paul亦忍不住插嘴說：「佢痕咪𢱑一𢱑囉！佢有冇攞出來呀？冇呀嘛，佢攞出來你地就慘。」
家強聞言即說：「我摸下有冇甩拉鏈之嘛，都睇唔到啲乜嘢，咪又係得條褲。」
採訪：胡比　攝影：陳慧安