歷史不但可以令人溫故知新，更可以幫人賺錢。美股三重結算後，果然重演早前兩重結算後大跌的走勢，杜指大跌127點，收9072，納指更跌逾2%，收1610。
趙飛雲早市在2.95元沽出中糧（506）後，在0.108元買入80萬份恒指Put輪9712，尾市見港股跌幅收窄，在0.116元沽出50萬份獲利，留30萬份過夜，博美股噚晚未跌完，恒指今日跌穿250日線（現處9566），向9400尋底。
大市走勢雖弱，仍有個別股份展現強勢，好似倉內隻海域（1220），平收1.37元，風雨中企得好穩，只要大市定番啲，相信又會踩油開車。
另一隻要留意的強勢股係建星環保科技（8011），昨日逆市升4%，收79仙，再創上市以來新高。建星主要研製造紙填料「利物得」，用作造紙添加劑，能大大減少造紙所耗木材，正好配合內地的環保政策。早兩年公司處於投資期，業績均有虧損，今年首季仍虧近95萬元。不過大行老友報料，話建星開始步入收成期，第二季業績好有機會轉虧為盈，下半年盤數可望更靚，值得憧憬。
睇番張圖，建星由5月中開始營造圓底，近日破關而上，升得稍急，可待後抽至75-77仙買入，博賺兩分利錢。
趙飛雲