藍采和、何仙姑令你聯想到甚麼？大概都猜不到與「飲食」有關係吧。最近有間日本餐廳以中國「八仙」作為食店嘅菜式名稱，有新意之餘又夠晒gimmick，其出位嘅宣傳策略更成功吸引不少食客慕名一試，享受與八仙的「超時空接觸」。
記者：何善華 攝影：林栢鈞
Models：Lily,Ming（Imagine）
逢星期一至三、五出版
這間開業3星期的日本居酒屋，賣嘅當然係日本食物，但有不少菜式以香港人熟識的「八仙」人物命名。負責人唐世昌話，設計每款菜式時會利用菜式形態、顏色、諧音，去切合「八仙」嘅身份。雖然有些名稱與「八仙」本身未必扯上直接關係，但不少食客品嘗「八仙」菜式後都會心微笑，算是踏出了第一步。
唐世昌表示，香港人對飲食嘅要求提高咗，如果再跟從舊有模式去經營日本食店，就等如「坐以待斃」，所以一於響應董特首話齋，叫市民要「與時並進」，迎合市場趨勢。「諗菜名真係傷腦筋，但為咗令菜式更加特別，後來想到以古人名稱作招徠；況且這兒的裝修和擺設都係以日本居酒屋為主題，只不過菜單較為「中國化」，所以絕對唔係『掛羊頭賣狗肉』㗎！」
除了8款「八仙」菜式外，食店更推出一系列特別調配嘅雞尾酒。唐世昌話有幾款雞尾酒重係「無色無味無臭」，但其威力絕對唔係「人咁品」，女士們淺嘗三兩啖，酒力就會發作，所以食客要衡量自己嘅酒量先好挑戰呀！
用上新鮮荔枝浸嘅荔枝雞尾酒，集「無色無味無臭」於一身，品嘗過後極可能「醉到唔識返屋企」，識飲之士即管放馬過來。
新鮮蔬菜加上6粒炸蝦球，何以會稱作「何仙姑」呢？原來蝦球用上白菌菇作材料，此「菇」等同彼「姑」，只要同音就可以。
材料有茄子、南瓜、蝦肉炸成的天婦羅，沒多餘的炸粉，材料配合得啱啱好，拍得住翩翩公子「藍采和」。
看上去好像是兩款不同的蟹子壽司，但其實有一半是用墨魚汁染色而成的，黑橙相煞互相輝映，十足十一對「孿生」兄弟般；「雙子」與「湘子」同音，取名為「韓湘子」亦教人明白。
用人手打製而成的肉餅，極具心思，再加上燒熟一半嘅鵪鶉蛋置在雞肉上，猶如曹國舅正在欣賞河塘月色……唔明？是時候發揮一下想像力了。
6支竹籤上有雞頸肉、雞批肉、蒜茸豬肉、雜菜、蘆笋、車厘卷煙肉等。唉，今時今日呂洞賓竟要以竹籤代替刀劍，恐怕「出師未捷身先死」！
嗜酒如命的漢鍾離，若能有幸享受這杯柚子皮加蜜糖的雞尾酒，或者都會拍爛手掌！
鮮果沙律包括青瓜絲、蟹肉、士多啤梨、芒果等，口感很爽很清涼，品嘗後頗感朝氣。恐怕張果老今後或要改名作「張果佬」了。
地址：銅鑼灣勿地臣街3號宏通中心2樓
電話：25911813
營業時間：12:00nn-3:00pm,6:00pm-12:00pm