憑電影《神探俏嬌娃2指環密令》再戰江湖嘅荷李活女星狄美摩亞（DemiMoore），可以話係近期見報率至高嘅藝人。成四十歲嘅狄美同細佢十五年嘅男友艾斯頓古查（AshtonKutcher）嘅戀情，令佢增加唔少聲勢。
狄美同艾斯頓𠵱家出親街都俾人昅到實，但係佢哋一於少理，當眾打情罵俏，不過我羅拉就覺得佢哋似做騷多啲。繼早前佢哋出席派對時，狄美喺艾斯頓面前拉起條裙大跳豔舞之後，早幾日狄美同艾斯頓去餐廳食飯，又再重施故技，當眾換衫，成為全場焦點！
話說佢哋喺一間餐廳入面撐枱腳，唔知艾斯頓有心定無意，竟然將啲酒倒咗落狄美件衫度，狄美喺眾目睽睽下，好敏捷咁剝咗件污糟衫，露出黑色喱士胸圍，然後再換件新衫。
咪話我羅拉陰謀論，其實美國傳媒都話佢哋博宣傳，好似早排狄美拖住艾斯頓，帶埋三個女同前夫布斯韋利士（BruceWillis）去新片首映，竟然遲大到，有內幕人士就話狄美專登等其他主角入晒場之後，先施施然同一家大細出現，引晒所有記者圍住佢哋，擺明做戲啦，不過狄美嘅發言人亦例牌否認！