上個月底，生命科技（1180）同東聯控股（1182）公布供股，股價皆跌到四腳朝天，可能臨近股東科水限期，股價最近均大幅回升。經紀陳話，睇嚟係想吸引股東參與供股。
生命科技早前公布2供1，每股供0.10元，集資8590萬元。至於東聯則先搞10合1，然後1供1，每股0.30元，集資總額不多於5300萬元。
兩股公布供股後，生命科技曾跌穿供股價，低見0.093元，東聯最低見過0.028元，即係合併後的0.28元。
最近兩間公司嘅股價一條氣反彈，生命科技管理層就勤力啲，得閒都會搞吓投資者關係活動，成交亦較大，見到鑊氣。相反，東聯就冇乜聲氣，似屬乾升。生命科技噚日升6.67%，收0.112元，而東聯則升7.32%，收0.044元。
至於兩股有冇得炒？經紀陳話，生命科技炒味較濃，跟勢短炒或者炒吓即日鮮亦無妨，但東聯因為成交細，比較難玩，最好都係等佢供完股至算。
慕容小初