今年有好多老友嘅仔女喺美國讀完大學，所以大部份都飛咗去美國參加仔女嘅畢業典禮，順便放假遊埠、探訪親友。呢班老友喺香港叫做有啲地位，但去到美國就為仔女勞役。基金L嘅仔喺MIT讀完MBA，畢業即暫時失業，點叻都冇用，所有名校畢業生都是如此，因為今日美國講得最多嘅兩個字就係layoff與cut-off。老友們啲仔女喺美國搵唔到工，即使返到香港，情況亦唔會好，唯一嘅解決方法，就係叫仔女再讀書，文憑也好，碩士也好，語言班也好，總之再讀，父母繼續磅水。即係話，父母想話退休享福呀，閘住先，再捱幾年啦。
喺美國退休唔係容易㗎。基金L一位美國朋友C，係香港移民，到咗美國十幾年，一年比一年擔心，但最近就十分開朗噃，原來朋友C再在公司做多一個月，就滿五十五歲，而佢亦喺公司做咗二十幾年。過五十五歲生日，有乜咁特別呢？呢位朋友C話：「過去十年，年年驚炒魷，一炒魷，退休後嘅醫療保險就冇着落。𠵱家好咯，下個月就夠五十五歲，美國勞工法例係，喺一家公司做滿年資，做到五十五歲，之後退休，公司就會繼續為我供醫療保險嘅八成，我自己畀兩成，慳番好多好多錢㗎！」美國人老咗，最怕無醫療保險，直情驚到腳軟，即係五十五歲之前一兩年，好驚失業，朋友C守得雲開見月明，於是一身鬆晒，恢復青春笑容。