政府最近訂定工廈轉用途嘅補價計算標準，目的係鼓勵業主將工廈申請轉用途，例如轉做寫字樓。但對市道唔算好嘅工辦大廈，會否構成壓力呢？正當蘭西憂慮之際，卻收到消息話有工辦大廈租金逆市上升。
九龍倉喺沙田石門區嘅工辦物業匯達大廈，聽中原地產新界工商部營業董事楊龍講，業主最近將租金叫價調高咗，由之前嘅每呎六個半加到六個八。原因係物業嘅空置率低，只得百分之五。
楊龍透露，原來成個石門區，只得匯達大廈設有穿梭巴士來往火車站。
中原早前都做咗個匯達大廈嘅租賃成交，面積一千三百四十方呎，淨呎租六個半，租客係電訊公司。匯達嘅租客有公證行、高爾夫球用品公司同燈飾公司。𠵱家該物業放租嘅單位，面積介乎六百二十一到八千多方呎。
香港嘅酒店，好多都會撥出部份房間，以長租方式出租，但就好低調咁透過測量行或者地產代理幫手搵客。聽講話，最近推出長租嘅酒店多咗，有啲重賣廣告吸客。
位於佐敦嘅大華酒店，日前有廣告出街，話有月租房間推出，重係震撼價嘅六千六百蚊起，租客唔使畀按金，每個月又有五百蚊飲品贈券，用電話同健身室唔使錢，計落實際月租唔使六千蚊。𠵱家新界區嘅酒店同服務式住宅月租都係咁上下，佢哋會有乜招數還擊呢？
「沙士」疫潮過後，酒店入住率只係回升番些少，但仍然偏低，照咁睇，酒店業為咗爭呢類月租租客，重有排鬥。
將軍澳有唔少村屋都幾受歡迎，間唔中會有筍盤。世紀21將軍澳區董事鄺志輝話，一個位於將軍澳村一樓嘅銀主單位，四百三十方呎，喺拍賣前以四十五萬成咗，每方呎一千零四十七蚊，價錢認真抵，因為七百呎嘅村屋，造價都要近兩千蚊呎。
鄺志輝講，將軍澳村四百幾呎單位，一房一廳設計，佔總數唔夠兩成，𠵱家冇放盤。買家係佢哋嘅熟客，買嚟收租，估計回報率接近九厘，都好吸引。至於七百呎嘅單位，放盤唔夠三十個，叫價百五萬到百七萬，但相信百二萬左右會有承接。
中原地產港島區董事唐秉正話，美元滙價下跌，料吸引外資嚟本港投資，估計未來一年，發展商推出嘅超級豪宅，就算開價萬五蚊呎，都有承接。
就快開盤嘅赤柱黃麻角項目，係最有可能賣到呢個價錢嘅超級豪宅盤。
唐秉正咁有信心，皆因佢話近期好多豪宅造價都好理想，如加列山道七十一號，呎價已經喺萬三到萬四蚊水平。
全港最高嘅寫字樓中環國際金融中心二期，已經建成，遲啲就可以入伙，發展商之一嘅新地，今日就安排物業嘅副項目總監鍾永添同鄧明庚，向傳媒講解國金二期嘅工程設計，同埋建築特色。
為咗要令傳媒影到八十八層高嘅國金二期宏偉外貌，發展商建議攝影記者可以去兩個地方拍攝，就係灣仔金紫荊廣場，同埋大角嘴海傍。
不過，市場最關心嘅，相信係呢幢巨無霸商廈，對寫字樓租市有幾大影響。
蘭西
電郵地址：
