日本女星乜都有得選騎呢
榮子貪大隻佬刺激　麗奈冧悟空

呢個世界日日都有唔同類型嘅選舉，睇到我羅拉麻木晒，但最近日本雜誌《Junon》搞咗個「乜都有得選選舉」，騎呢得嚟都幾好笑。唔講你唔知，小池榮子其實要佢男友以外嘅人先刺激到佢，而奧菜惠最近愛送鎮江醋畀fans。

最能刺激榮子嘅人物
原來小池榮子最仰慕嘅雖然係個格鬥家，但唔係佢男友坂田亘，而係日本有名嘅AntonioRodorigoNogueira，另外電影《辣身舞》嘅柏德烈史威斯（PatrickSwayze）同米奇老鼠，都係佢永遠嘅偶像喎！

田中麗奈同悟空初戀
田中麗奈鍾意睇書就好多人都知，但估唔到佢都睇好多男仔漫畫，其中最鍾意嘅係《龍珠》，其次係《GreenHill》同《去吧！稻中兵團》，其中撒亞人悟空重係佢初戀情人㖭！

奧菜惠呷黑醋至精
早排去過上海嘅奧菜惠，視佢喺內地第一次見嘅黑醋為重大發現，𠵱家佢個袋入面一定有一寶，首選嘅係鎮江香醋，其次就係恒順香醋或者鎮江黑醋。奧菜惠話黑醋對身體好有益，送畀fans或者自用都啱使！

上戶彩最想學整咖喱飯
呢排忙到有氣冇定唞嘅上戶彩，自稱整嘢食好水皮，但佢話：「整嘢食叻嘅女仔一定會加分。」所以上戶彩決定由低學起，首先最想學識整嘅，就順序係咖喱飯、日式燒餅同埋炒飯！