數碼影音：
實地水底測試CyberShotU60濕身誘惑

SONY旗下壽司機U系列，以超迷你機身為主打，嚟嚟去去最多換吓機殼顏色，機能上鮮有大突破。不過同系列最新型號嘅U60，就一反U系列模式，外形180度轉變之餘，重加入1.5米防水功能，唔只落雨唔怕整濕部機，就算掛上身落水游都唔怕，最啱喺沙灘影餐飽。

記者、攝影：徐影龍　
ImageGirl：Patsy

開宗明義玩防水，U60有效水深為1.5米，比之前其他牌子所謂防雨水更勝一籌，唔怕落雨外，就算拎住游足一日水都得，成班人去沙灘或泳池一齊玩，熱鬧氣氛亦即時提升，型足全場！要注意U60有效水深為1.5米，只適宜游水用，就算閣下有超高潛水技能，都唔好拎部機潛得太深。針對水底拍攝，U60尚有不少獨門機能，如水底白平衡，可避免相片出現偏藍現象。另外屏幕經過改良，有效利用直射及反射光源，就算陽光底下亦非常清晰光亮，當然更為有利於水底拍攝。U60賣價為$2,290，亦算幾抵玩，因為其他機種單買防水殼閒閒哋都過千蚊，除開條數計一啲都唔算貴。

直立塑膠機身似玩具
U60採用之規格跟同期推出嘅壽司機U30大同小異，不過外形就大相逕庭。直立式機身設計已經大有不同，體積亦大過傳統U系好多，為防水而採用嘅全塑膠機身極有玩具Feel，古怪設計令部機放喺枱上，都有種企唔穩感覺，玩嘢味道十分之重，不過勝在手感極佳，單手操作完全冇問題，一邊影一邊轉換拍攝模式都好輕鬆。
機能方面只算一般，除感光元件為二百萬像素SuperHADCCD外，尚有六種唔同場景拍攝模式，以及四種相片特效，如油畫、懷舊等。對應1GB容量MemoryStickPRO，基本上影硬照冇可能用得晒，最啱喺水底拍片之用，動畫拍攝有160×112解像度，可惜每段片最多拍攝15秒，冇靈活運用到1GBMSPRO嘅強項。

U60Profile：
體積：60.2×116.8×43.3mm
重量：149g

U30夏日換新裝
其實U系列另有一款新型號U30登場，機能上跟防水機U60幾乎一模一樣，同樣採用二百萬像素SuperHADCCD，具有160×112解像度之動畫拍攝，以及支援MemoryStickPRO等。不過外形上仍保持壽司機一貫超細特色，收喺袋中或掛頸都咁方便，而且全金屬機身好有質感，並無U60咁玩具Feel。U30跟以往一樣，一口氣推出多款顏色機身，包括紅、橙、藍、黑、白同香檳金一共6種顏色，新加入嘅反光鏡面，令用家玩自拍時更能掌握構圖情況，唔會影極都唔啱心水。

U30Profile：
體積：85×40.3×29.7mm
重量：89g

SONYHK
24小時客戶熱線：23452966