早輪，亞Mark提到韓國現代汽車（Hyundai）來年香港嘅代理權，加入代理開德國平治（Mercedes-Benz）汽車嘅仁孚行競爭後，惹來不少外間揣測同竊竊私語，話究竟仁孚行是否鬧着玩，而且又會有幾多誠意呢？
查實，據亞Mark所知，早年另一間韓國車廠起亞（Kia），想重新打入香港市場前，仁孚行亦曾派員洽談競逐代理權，惟廠方有感仁孚行手握平治代理權多年，恐怕顧此失疲下無暇兼顧起亞汽車在港嘅銷售業務，因而只好另覓人選。
然而，聽聞今趟仁孚行再度出擊，對手現今就只剩得森那美集團；響佢哋龐大資源及人力物力作後盾外，據知仁孚行某位汽車部高層，重會響嚟緊7月順道到訪南韓現代汽車集團，咁你話佢哋又有幾大誠意吖！
近期本地傳媒廣泛報道23條立法在即，加上廣管局對鄭大班在商台節目《風波裡的茶杯》嘅言論強加打壓，就連一向政治冷感嘅亞Mark，亦開始感受到一股無形壓力；亞Mark得四眼編輯賞識，而獲得此細小欄目，與大家論盡車壇點滴，從不忌諱大公司大財團嘅秋後算帳，皆因香港人一直享有言論自由，惟近期政府嘅言行不顧民情，他朝23條立法，莫非讀者就只愛讀亞Mark吹噓某某汽車了得，唔買就笨咁嘅說話嗎？7月1日亞Mark寧棄政府請食飯請睇戲，亦要上街一抒己見呢！