三星近排啲機嚟完一部又一部，上星期先嚟完兩部，今個星期重有部三頻機S500水貨返咗，S500係S300嘅延續篇，三星今次就唔玩雙彩芒，外芒轉番單色，不過有幻彩色底。外形繼續用圓身摺機，女用家似乎更啱手形。功能上大同小異，40和弦、6萬5彩芒已經係指定動作，新功能有Class10嘅GPRS及Java，開價$2,480，唔可以叫做平，只係算做中規中矩。
查詢：鉑匯科技（23987320）
雖然彩芒機大行其道，不過對於只係要求打出打入嘅用家，一部輕巧嘅手機可能更加啱用，所以呢類用家大可以考慮西門子部超細摺機8008，早個星期場內重賣緊$1,500左右，今個禮拜就大幅跌至$1,180，水貨重只係$1,000左右，跌咗成幾百蚊。有齊EMS、WAP，以及GSM900/1800雙頻及四和弦鈴聲，而且話晒都係西門子個嘜頭，千鬆啲的確可以諗諗佢。
首部登陸香港嘅SmartphoneQtek7070，喺手機場已經隨處可見，不過近日歐洲版Qtek都有英文版水貨，而且個名就叫做SPV，外形大致上差唔多，不過細心睇吓就會發覺有好多地方都唔同，機身顏色全身銀色，更加CyberLook，而喺Qtek中間的操控桿變成四方向按鈕，機身底部線條更稍為收身。最緊要就係價錢比Qtek平差唔多一千蚊，只售$3,300，不過就唔知可唔可以外掛中文，若果可以的話就真係更加抵玩。
查詢：迪生數碼（23973999）
文：羅新基