大班暫時封嘴，商台急邀李鵬飛救亡，於是香港廣播史創下新猷，就係一位主持聲音可以兩邊走，李鵬飛都算巴閉咯，既做港台節目，又在商台出現。以前飛哥喺商台做夜晚節目「不准錄音」，身價甚高，聽講有百幾萬一年，斷鐘計，薪酬更多過鄭大班。後來商台要求飛哥另簽新約，主要係講足球（騎騎，大家都明啦，配合馬會做莊吖嘛！），飛哥做過行政立法兩局議員，要兼顧地位面子啫，當然唔肯，於是離開，俾港台冷手執個熱煎堆。你知啦，港台俾政府管住荷包，每年預算大部份係用來支付員工薪酬，冇乜水請外人做節目嘅，一切靠拍膊頭，講義氣，講為公眾服務，總之唔好同港台講人工，飛哥放棄商台嘅百幾萬，而為港台捱義氣，呢啲數，審計署長唔識仄嘅嘞。現在飛哥返商台客串，相信唔會白做嘅，即係攞商台錢，同時又為港台做，唔知算唔算係劫富濟貧呢？
啲官係咪以為冇咗大班，就冇人鬧呢？唔係噃，飛哥政壇經驗豐富，對官府內部運作，比大班更為熟悉，啲高官俾飛哥質問，可能更加出醜。飛哥近年老馬有火，反董言論連珠炮發，如果佢朝朝發炮，相信廣管局、特首辦會十分頭痛。之不過，一葉知秋，國安法通過之後，加上老闆級嘅政協要求作者自律，鄭大班式言論嘅黃金時代已過！