方中信小時候已是車癡一名，不時與朋友仔鬥車和改裝車；原來，方中信所指的鬥車其實是「阿信推車」，而改裝的則是單車而已；不過，方中信曾因父親不肯給他錢買單車，而靜雞雞偷了父親一百大元來買單車。
愛車如命的方中信，其父亦是車癡一名，方中信記得小時父親經常換車，每隔兩年便換一部，先後擁有過太子（已絕迹江湖）和萬事得多個型號；由於父親經常換車，對汽車亦素有研究，是以方中信在父親薰陶下亦對汽車產生濃厚興趣。
方中信說：「細個嗰陣我就係玩玩具車，記得讀小學嗰陣，我成日同啲同學仔喺學校鬥車，不過，所謂鬥車，其實只係推車仔，我哋用粉筆喺地上面畫一個圈，然後一人推一下，邊個推得遠就邊個贏。」
除了推車仔外，方中信小時候亦喜歡改裝單車，由一波改為三波，另外，又改裝座位和噴油，將單車完全改頭換面。
方中信笑說：「改單車呢樣嘢係無師自通，無人教我㗎，記得細個我為咗買單車而偷老竇錢，因為當年冇單車徑，要踩單車嘅話就去馬路踩，老竇話咁樣好危險，所以唔肯畀錢我買，有次我咪靜靜雞偷咗佢一百蚊嚟買單車囉，最搞笑係我偷咗佢一百蚊佢都唔知，到我大個咗之後我話畀佢聽，佢先知道呢件事。當然，偷錢嘅行為好唔啱，大家千祈咪學！」
方中信小時候經常與友人鬥車（單車），炒車意外可算是屢見不鮮，經常弄致手損腳損，被父母大罵一頓；不過，方中信「車照炒時亦車照踩」，其父母也沒他奈何。
採訪：戴彩煥
