李萬祺自從破產之後，變得好低調，時時神出鬼沒，反而佢前妻余安安就因為要返出嚟拍戲，成日見報。前晚七點幾，馮仁昭有個老友見到李萬祺喺跑馬地景崗街投注站行出嚟，佢着住T恤、揹住背囊，心口掛住部手提電話，打扮樸素，佢應該去投注站買完三T出嚟，事關噚日三T十蚊一注獨得有成一億三千萬，想發達就梗係要早啲落注啦！馮仁昭冇破產都買咗少少，如果呢鋪畀李萬祺「扑」中，咁就唔使捱窮啦！
不過，場馬噚日跑完，三T結果得兩蚊一注中，派二千四百萬，馮仁昭梗係冇份啦，唔知係咪李萬祺咁好彩呢？
前晚李萬祺離開投注站後，本來企喺門口等車，後來佢跑到對面馬路，上咗一架好豪華嘅黑色平治房車絕塵而去，唔使搭巴士，可能係老友接佢啦！
安雅喺電影《搞什麼鬼》入面，同男主角郭定文有大膽床上戲。拍攝嗰陣，安雅主動攬實郭定文，以國語教佢：「你從我脖子這邊吻過去！」好似好有經驗，之後佢哋就旁若無人咁親吻、愛撫，唔怪得導演朱延平大讚安雅夠專業，重話：「找她演就對了！」
自從張國榮過身之後，佢好朋友唐鶴德（唐唐）深居簡出，不過近排都有約朋友去做運動，食吓飯咁。前晚唐唐去咗灣仔鴻星食飯，同行重有施南生、陳淑芬同蘇絲黃等一班張國榮生前老友，眾人喺十點半左右醫飽肚後，有講有笑咁離開，睇嚟唐唐嘅心情已經平復。
之前有報道話周渝民（仔仔）因為缺課太多，所以期末考國文課被取消資格，噚日仔仔去咗醒吾技術學院考試，校方強調事件係誤會，噚日醒吾進修部主任王世椿話，經過調查，仔仔缺席率冇超過被扣考規定。仔仔噚日考試，下晝三點幾就交咗試卷離開學校，佢頭耷耷走出教室，記者問佢考成點？佢只答：「還好」，就急急走人。
中建電訊主席麥紹棠，日前要求劉德華就佢之前接受傳媒訪問時，對有關批評麥紹棠嘅言論道歉，呢件事搞咗咁多日，噚日麥紹棠經公關公司向各大傳媒發表聲明，話佢同劉德華嘅律師喺上周五達成共識，劉德華答應喺呢個星期五（二十七日）出版嘅《忽然1周》，刊登道歉聲明，件事就算告一段落。
謝賢（四哥）噚日喺港台《舊日的足跡》節目錄音訪問裏面，大談同個仔謝霆鋒點相處，不過四哥一向都唔會過問仔女啲感情事，所以佢對於霆鋒嘅緋聞搞到滿城風雨，就好得戚咁話：「我覺得佢渣過我，我以前嗰啲都冇人知。」至於霆鋒同梅艷芳嘅緋聞，四哥就好多謝阿梅肯以朋友身份開解霆鋒。
