最近有傳鄭希怡（Yumiko）的宣傳人員私下指摘黃伊汶（Emme）博宣傳，黃伊汶和Yumiko前晚碰頭，二人雖口口聲聲否認不和，但被要求合照時，Yumiko身邊的工作人員卻百般阻撓，最後要出動譚詠麟硬拉二人合照。
黃伊汶和鄭希怡同走性感跳舞路線，故常被人拿來比較。日前有雜誌指Yumiko所屬的唱片公司人員私下指Emme博宣傳，又指Emme未夠班。
前晚Emme和Yumiko在將軍澳電視廣播城演出《明愛金禧暖萬心》，在話劇中飾演兩姊妹，慶功時又碰杯慶祝和閒談，感情看似不錯。
記者在後台問Yumiko對於其宣傳人員指Emme未夠班，她說：「大家一齊做嘢，係朋友，我冇聽過我公司咁講佢，我唔怕比較，亦唔介意。」問二人會否面左左？Yumiko說：「唔會，我起初都怕，但我哋都有一齊綵排，如果公司有不滿就唔同佢合作啦。」
Emme則說：「我唔清楚成件事，我又冇親身聽到，如果我博宣傳，咁我係咪應該嗌交，先會愈寫愈大呀？我𠵱家表示友好咪斷咗宣傳路？大家見面唔使黑口黑面，合照我冇所謂呀，我都唔會因為咁而有芥蒂，大家合作唔使鬥到死去活來啫。」
言猶在耳，當記者要求二人合照時，Emme大方企定等影相，反而剛化完妝的Yumiko以要補妝為由，被助手拉走，Emme的工作人員見狀，即時說：「補妝唔知補幾耐喎，不如我哋又補妝囉。」然後拉Emme入化妝間。
譚詠麟（阿倫）得悉此事時即說：「等我問吓佢哋先。」並隨即走入化妝間，拉Emme和Yumiko出來合照，二人才尷尬地站在阿倫和克勤兩側，阿倫見狀說：「女仔企中間。」她們才勉強並肩而立。
問阿倫是否覺得Yumiko和Emme不和，他說：「娛樂圈係大家庭，冇事嘅。我唔知佢哋有冇嘢，點都好，即時化解咗先，本來可能無傷大雅、個心冇嘢嘅，寫寫吓就唔知點面對。」
採訪：卓美娟攝影：仇志德
