美股上周四大散之後，周五回穩，今周港股期指結算，仍受美股左右。美國連續3個月，基金有淨買入，市場錢多，美股唔慌會衰得去邊，港股亦然，一萬心理關口，遲早會再升破，不過過程之中難免會有反覆，反覆之中，見低位買恒指Call輪，着數過見高位買Put輪。
恒指若回落多少，可以諗吓揸啲Call輪，對象有9689、9749與9785。3隻輪溢價唔高，槓桿率則好勁，因此若然睇啱市，揸着呢啲輪會賺到笑，睇錯市則蝕到喊，所以咪咁大注。
政府有聲氣停建居屋，對啲地產股可能會有小小心理刺激，賣樓股或者有機會再彈一次，吼新地Call輪同恒地Call輪。
新地輪揀9786，10月到期，現價35.5仙，溢價6.3%，槓桿率11.8倍。恒地輪買9787，明年2月到期，現價38仙，溢價3.7%，槓桿率6.3倍。長實（001）上周跑輸畀其他3隻大地產股，有望追番上去，兩隻Call輪9764與9829有望反彈，講爆炸力，9764強啲，有15倍以上槓桿率，當然要畀高啲溢價，9829則槓桿率低啲，不過溢價低啲又着番數少少。
電盈（008）喺5元邊邊搵到支持，Call輪9762值得諗少少玩吓，想搏殺，則選擇9662。電盈Call輪溢價唔低，炒就可以，坐得耐則咪搞。
章盛