近排只要有公司搞招聘會，就會吸引到大批人應徵，上個禮拜長實個請人騷，結果有四千人面試，即日落實請一百三十人。
長實執行董事趙國雄話，七成係大學生，主要做置業精英，每月人工由六千至八千蚊，有幾個見經理或以上職位，又可以進入第二輪面試嘅人士，重達碩士學歷㖭。趙生又話，有啲應徵者真係好有心，做足準備工夫，口才了得，實在係人才。長實嚟緊有咁多樓賣，蘭西好快就可以見到佢哋。
香港好大機會短期內從疫區名單中除名，下個禮拜就係七月一日回歸紀念日，政府搞咗好多活動畀市民參加。長實就打算喺新加坡節後，喺旗下商場再搞日本節，趙生話，到時會有日本食品、服裝、同日本歌舞團嚟香港表演，舉行地點包括紅磡國際都會、漁人碼頭、馬鞍山廣場等，詳情遲啲會公布。
深井碧堤半島一連兩日喺售樓處搞嘉年華，節目多籮籮，有時下流行嘅香薰蠟燭、水晶紋身等示範，不過最多人睇嘅，係由幾位着得性感又活潑嘅靚女，表演嘅連場勁歌熱舞，舞蹈員喺勁歌襯托下，落力演出，施展渾身解數，重不時換上唔同嘅舞衣，精采又養眼，絕無冷場，令圍觀嘅人愈嚟愈多，差啲搶埋碧海連天示範單位首次開放嘅風頭㖭。
近年經常有私人屋苑業主，出售會所使用權圖利，但都係靜靜哋放售，不過情況愈嚟愈張揚，網上一啲有關住宅嘅討論區，周不時有人放盤叫價，也會有買家主動出擊徵求會籍。好似上個月有位自稱係富X花園業主朱太，喺網上向隔籬私人樓XX灣業主，徵求會所使用證，話𠵱家用緊，每月二百蚊，如果X
呢期發展商為催谷代理賣樓，好興喺跳bar之餘，再搞比賽，勝出嘅一組就有獎金。好似太古地產嘅西灣河逸濤灣，最近搞嘅代理比賽，最快做成十單，就贏到三十萬獎金。
今次只有中原、美聯同利嘉閣三間行可以參加比賽，按公司規模似乎利記輸蝕咗啲。
寫字樓市道唔好係人都知，但話晒係金融中心嘅中環商廈，租務表現重差過對面海嘅尖沙嘴，真係見者心傷。
業內人士分析，原因係中環寫字樓嘅租戶，主要係金融業、證券業同律師行，𠵱家呢類行業唔多掂，導致需求萎縮。尖沙嘴區就有廠家頂住，呢期工業市道好番啲，租金相對就冇咁傷。十年河東十年河西，呢句話真冇錯。
香港興業今日請嚟二十位應屆候選港姐，喺藍天海岸會所泳池會見新聞界，發展商話今次係歷屆港姐首度以私人屋苑作宣傳活動場地，蘭西就覺得利用港姐介紹樓盤會所，先至破天荒。不過，有記者就更加關注，啲候選佳麗會唔會着泳衣出席，甚至親身體驗吓個大型滑水梯。
蘭西
電郵地址：
