近日努力催谷政府申辦「09東亞運動會」嘅香港奧委會會長霍震霆，噚日晨早到咗灣仔運動場，主持「03奧運歡樂跑」嘅開步禮。可能係「沙士」逐漸遠離香港，有成二千幾人參加，再加埋二十幾個香港精英運動員，場面熱鬧。
開步禮後，小霍同一班着住「奧運跑」T恤嘅行政立法兩會議員，包括范徐麗泰、鄭耀棠同葉國謙都象徵式跑一圈四百米。
立法會主席范太就真係認真忙。跑完步又去向沙士女英雄鄭夏恩鞠躬，下晝重去馬會做嘉賓，頒獎畀啲冠軍騎師、練馬師同見習騎師。八方有位老友見到范太，問佢係咪成日嚟馬場，呢位新馬主話有成日嚟，同老公嚟飲茶，不過范太重未贏過馬會錢。
（圖）范太（左二）一日走幾場，晨早就同小霍（右三）、林瑞麟（右二）等人跑咗四百米。
成啟聰攝
傳真︰2623-9278
電郵︰