碧咸形象正面，人又靚仔，真係好多年輕人嘅好榜樣。不過，最近我求大俠就發現佢有樣嘢唔係幾得，就係唔得孝順！
傳媒日日追訪碧咸，要攞到內幕料，最好就梗係捉實佢身邊親人問長問短啦！而一向多嘢講嘅碧咸老竇泰德，最近就同傳媒呻，話以前碧咸喺英格蘭踢波，佢得閒就可以入場捧吓個叻仔場；不過𠵱家碧咸過檔皇馬，睇嚟都好難再有呢支歌仔唱，因為應付唔起個個禮拜飛去西班牙嘅開支喎！
其實以碧咸呢幾年嘅收入，佢老竇都重要話連飛去西班牙嘅錢都冇，可想而知碧咸富貴咗之後，有幾關照佢老竇啦！
上星期六喺法國踢嘅土倫廿一歲以下錦標賽決賽，葡萄牙以三比一擊敗意大利。呢班葡國後生仔真爭氣，攞冠軍除咗幫葡國喺出年辦歐洲國家盃造勢外，最重要係當年奪世青盃嗰班葡萄牙「黃金一代」，好似費高咁，睇怕國家盃後都要引退，𠵱家又有班新嘅「黃金一代」啦！
記得舊年世界盃前，喀麥隆嘅伊圖喺熱身賽射破英格蘭大門，佢重話呢個擊敗蘇甘保鎮守嘅英格蘭嘅入球，係為熱刺而入嘅，擺到明希望荷杜垂青。一年後伊圖聲價十倍，呢次佢又話想去AC米蘭！不過AC咁多前鋒，畀你去到都未必係好事！
列斯門將羅賓遜成為幾支英超球會「獵物」，維拉領隊奧拉利就準備出價三百萬鎊轉會費，收購呢個佢當年喺列斯帶出身嘅後生仔。我求大俠就覺得對於呢位國腳嚟講，維拉嘅出手都係低咗啲，話晒阿仙奴同埋曼聯等大會都昅實呢件好嘢，維拉呢個價就似乎爭咁啲誠意囉！
西甲聯煞科戰，拉科魯尼亞同埋華倫西亞呢兩支近年除皇馬及巴塞以外，最具代表性嘅西班牙球隊，由於喺分數上都冇嘢好爭，兩隊都被編到上個禮拜六比賽，等佢哋早啲完成呢個傷心球季！結果都順利贏波收工，拉科魯尼亞重係落後對手愛斯賓奴大半場，最後都能反敗為勝，總算對球迷有交代，贏波攞尾彩總好過衰收尾。
啱啱以英超歷來最差成績降班嘅新特蘭，最近就搵咗個經紀返嚟，幫手賣走隊中一啲值錢球員，重話每賣一個，個經紀都可以抽佣㖭！新特蘭一直無法賣走球員，我求大俠就認為係因為佢哋將啲球員定價過高，至無人問津啫！如果肯減吓價，或者好過被人抽佣㖭！