大法官楊鐵樑爵士退下行會之後，差唔多已經退隱江湖，八方日前喺慶祝英女皇壽辰酒會見到佢同太太拍拖出席，恩愛如常，就上前問一句近況如何？點知未講完，就見到楊太條頸包住晒，好似受咗傷咁；楊太就笑笑口回一句話：係啦，楊官整親我。
八方當然唔信，因為楊官出名愛妻兼畏妻，點會傷害老伴。追問之下，原來楊太最近有點不適要去做檢驗，𠵱家雖然已經冇晒事，但係就唔肯出外旅遊，話難睇，所以呢個夏天不外出。
楊官就快又開班教英文，八方問佢點評價《HarryPotter》一書嘅英文水準，點知佢話：「一本都冇睇過。」重笑呢本書寫畀十幾歲嘅細路睇。咁對小朋友學英文好唔好呢？楊官就話梗係冇狄更斯咁好，但係學到睇《HarryPotter》已經好唔錯。
順便問吓楊官點睇鬧得熱哄哄嘅《基本法》二十三條立法，點知佢話已經退休，冇去睇法例嘅細節，呢啲逐個字研究嘅嘢留番班後生做，又讚余若薇、梁家傑佢哋好叻，實冇問題。
八方再追問落去，楊官竟然話，「你搵個七十幾歲，退晒休嘅人去睇，香港悲唔悲？畀啲後生一個機會上，老人應該休息。」
（圖）楊鐵樑同太太拍拖出席英女皇壽辰酒會，楊太條頸包住晒。
韋志滿攝
傳真︰2623-9278
電郵︰