經SARS同非常罕見的炭疽病後，好多香港人都開始意識到個人衞生及健康的重要。個人衞生，只係洗洗手就夠？當然唔係啦！在日常生活中，其實環境衞生都一樣不容忽視。特別是夏天一到，老鼠、曱甴同蚊子等不速之客特別猖獗，令病毒傳播情況嚴重。
記者：朱崇德 攝影：Jacky
Model：婷婷（SunSpot）
逢星期一至五出版
香港最常見的曱甴包括有美洲蜚蠊、澳洲蜚蠊和德國蜚蠊。基本上不論戶內或室外，只要是有食物的地方，都會有它的蹤影。曱甴不但會把病菌傳播，更會排出難聞的分泌物，令食物變質，其排泄物同蛻下嘅外殼，含有一些引致人體敏感嘅物質，未能接受者，會有出疹、流眼水同打噴嚏嘅症狀。最基本嘅防治措施，就是保持住所乾爽清潔，妥善貯存食物及殘渣，排水渠裝上密封渠蓋，亦可防止曱甴入屋。
攻擊力 100%（全方位任你點武！）
士氣值 100%（追打過程，鬥智鬥力！）
講到打曱甴，又點少得最就手嘅拖鞋呢！猶如「血滴子」式嘅飛拖鞋，係初學者常見伎倆，不過準確度係致勝關鍵，建議初學者以手揸拖鞋拍打較易掌握，若加埋唔使學都識嘅「追魂連環拍」，包保冇曱甴可以逃出你嘅拖鞋之下。另外，筆者有一個對付飛天曱甴的小秘技，就是使用強力定型水，瞄準目標狂噴，如果曱甴愈飛得快，定型水就愈乾得快，最後你當然係最型嗰個啦！
滅蚊，可說是夏天的重點衞生工作，一般人都知白紋伊蚊可以傳播登革熱，但近排在廣州風頭一時無兩的「日本腦炎」病媒一樣有蚊份，佢哋包括有三帶喙庫蚊、白雪庫蚊、棕頭庫蚊、致倦庫蚊同東鄉伊蚊等，而呢幾種蚊都有喺香港出現，所以大家要份外小心。
此外，日本腦炎病毒亦好似登革熱一樣，可經由卵傳給蚊的下一代，所以滅蚊工作應該要從蟲卵開始。打掃家居時，一定要經常檢查是否有容器積水，並消除一切滲漏源頭，絕對有助防止蚊患。
攻擊力 100%（基本上蚊嘅飛行速度好慢，捉佢唔難！）
士氣值 0%（見一隻捉一隻，治標唔治本！）
數勻全屋，最似蚊拍嘅器具，都係廚房個筲箕，捉嘅時候有少少要訣，就係個筲箕一定要密籠啲，同埋要整濕佢，咁樣一掂到佢哋，就會馬上纏住喺個筲箕上。
攻擊力 50%（見一隻捉一隻！）
士氣值 100%（吸管夠長，同曱甴、蚊子有非常安全嘅距離！
呢款真空吸蟲器，使用真空原理，把害蟲吸入並困住，最後害蟲會因真空環境致死，故毋須使用化學殺蟲劑。筆者試用過，發現佢個扇形吸口，可以將蚊子完全困住，而且吸嘴夠大，就算遇到曱甴，一樣無得匿！
一般老鼠可傳播的疾病包括鼠疫、叢林斑疹傷寒、鼠斑疹傷寒、漢他病同鈎端螺旋體病等，要有效預防這些疾病，市民必須積極保持環境衞生和妥善處理垃圾。
眾多傳染病中，漢他病要特別留意，皆因此病可引致病毒性出血熱，死亡率大約6%，就算痊愈，都會有數周至數月之久的全身倦怠感。
攻擊力 50%（守株待鼠，捉唔捉到五五波！）
士氣值 0%（一早起身見到大大隻死老鼠，重要善後，都咪話唔煩。）
放老鼠毒餌或老鼠膠，一定要了解清楚佢哋嘅匿藏處（或常出沒地方），然後再用佢哋偷食過嘅食物，混在毒餌或放在老鼠膠中，功效會事半功倍！
攻擊力 100%
士氣值 100%（完全冇老鼠敢入屋！）
金剛2000驅蟲器使用了電磁場及超聲波原理，製造出一個令害蟲（曱甴、螞蟻及蜘蛛）及老鼠無所適從的環境，將它們驅趕出屋外，好處是對兒童或寵物不會造成潛在危險，有效範圍大概460平方米。
銷售點：JCSHOP（31022783）