最近外國方面有消息傳出，話越野路華有意繼推出新一代RangeRover豪華四驅車後，再於2004年秋季，為旗下同樣備受車迷追捧嘅Discovery車系來一次大變身；新車不但外形變得酷似RangeRover外，就連車子本身嘅機械配搭亦有所改動，務求可有更出色嘅性能表現。
若筆者說新一代越野路華Discovery嘅造型，與新款RangeRover相近的話，相信大家都唔會反對，皆因廠方有意將新車形象提升至更豪華級別，故此車首部份會採用類似RangeRover嘅設計，望落變得份外吸引突出；車廂空間亦會因為車身尺碼增大，而變得更見寬敞舒適，當然唔少得重有齊全車廂設備啦！然而，該消息又指出，新車將會以一台能輸出約300匹馬力嘅4.2公升V8偈作骨幹，其後更會加入一台200匹馬力嘅4.0公升V6型號供用家選擇；同時，由於用上全新底盤配搭，匹配一套出色懸掛組合，從而令新車可有更出色嘅性能表現㗎！