港股在萬點關爭持，周五期指結算，未平倉合約逾8萬張，好淡料有激烈角力，上周恒指收9930，呢幾日估計會有幾百點上落，恒指料會回落到9600水平（呢個位大戶結算最有着數），守穩在250日線整固，結算後再升過，向10247上個浪頂進發。
美歐股市牛市已現，芬佬好有信心，但佢哋對港股仍有保留，不過，有圖表派朋友就實牙實齒話牛市已經來臨，重話下半年會升得重犀利。佢解釋牛市第一期嘅特色，就係大市一路上升，其間的調整唔會好明顯，即係大大漲小小回，點會咁樣，就係大戶同基金重一路買緊貨，每當個市回落少少，佢哋就會買得更積極，所以個市根本就冇得跌，即係每個小浪，升完之後，就在高位整固。好似呢幾個禮拜，基金同大戶一路吸納藍籌同國企，特別係國企，急升之後，只係回一回氣，又再升過。
芬佬話，下半年個市好大機會升上11000至11500，所以，基金同大戶𠵱家買貨係冇有怕，藍籌以現水平計，起碼重有10%至20%升幅，而國企就睇得更樂觀，保守估計都起碼升50%，個別甚至翻一番。芬佬有信心QDII下半年可落實，之前肯定已炒到熱火朝天，H股同A股拉近差距，此起彼回，H股升50%真係好保守估計。
旺城國際（2389）上周五有異動，高收0.64元，升4仙，突破三角形阻力，短線上升目標為0.8元，中線可向去年10月高位0.95元推進。
集團在中國設廠，主要製造電動工具出口，歐洲為主要市場，佔營業額逾7成，亞洲佔27.5%，歐元升值對集團有利。02年（12月年結），集團營業額3.43億元，升18.3%，獲利3025萬元，減少17.6%，主要是積極開拓新客戶及籌建新工廠令開支增加。
位於江蘇省海安縣的廠房已投產，並計劃3至5年內把自行生產比重調整至80%，以提升產品質素及降低生產成本，近年開發16款電動工具，大受客戶歡迎，接獲大量定單。另外，集團已開發氣動工具，首批5月付運，而本月付運的氣動工具更增加至12款。旺城往績PE6.5倍，今年盈利料回升，預測PE更吸引。
郭兆誠