早排大使喺電視節目度睇到台灣作家杏林子生前嘅事迹，雖然佢十二歲就患咗類風濕性關節炎，之後四十幾年都係坐輪椅出入，但佢憑住堅毅不屈嘅精神同埋家人嘅支持，畢生努力創作同埋幫助社會上嘅殘疾人士，佢積極樂觀嘅性格令大使十分敬佩。
大使諗起最近幫緊幾位貧窮嘅殘疾人士，申請購買電動輪椅嘅費用，佢哋有啲患咗罕見嘅多發性硬化症或者肌肉萎縮症，大部份因為對手同埋對腳嘅活動能力退化，冇力拎住支枴杖或用手推唔到部輪椅。雖然佢哋身體有缺陷，但大使同佢哋傾偈嘅時候，發現大部份都好健談、性格樂觀，一直好渴望有部電動輪椅出去接觸吓外面嘅世界；當中亦有部份積極工作，賺取微薄生計，從沒有放棄自己……佢哋同樣希望有部電動輪椅，可以繼續自力更生。
但係對於佢哋呢班月入僅足餬口嘅殘疾人士，要儲錢買部幾萬蚊嘅電動輪椅，真係好困難！所以，幾年前蘋果基金成立咗一個「電動輪椅專戶」，希望幫助貧窮嘅殘疾人士購買電動輪椅，希望各位善長仁翁慷慨解囊，你哋嘅捐助除咗幫助佢哋，買部電動輪椅之外，最重要係令佢哋可以「重獲自由」，獨立生活，增強自信，你願唔願意幫佢哋一把？
「電動輪椅專戶」：C0550
暖流熱線
電話：29908688
傳真：23702192
電郵：
網址：