早排沙士事件，令到好多零售股生意大受打擊，連帶股價都受影響。不過，賣鞋嘅美麗寶（1179）早前公布全年業績，盈利有成4868.5萬元，比上年增加14%，確實令人感到意外。
由於業績實在靚，美麗寶股價表現亦非常美麗，近排由0.70元水平一支箭咁升，上周五收1.07元，但成交就只得177.8萬元，頗為稀疏。
經紀黃話，雖然美麗寶股價升咗唔少，據聞有幾間證券行都留意緊隻股，稍後有報告推介都未定。小初則以為，美麗寶業績係截至今年2月底，當時沙士的打擊尚未湧現，業績未反映不利因素。但經紀黃話，人哋唔係咁睇法。
雖然美麗寶主要盈利來源仍然係來自本港，但比重已經較去年下降，相反大陸銷售所帶來的盈利雖然較細，但升幅就非常厲害，家陣大陸分店同埋特許經營店數目，加埋接近100間咁多，如果有關人士以中國零售概念作招徠，芬佬可能會受落。
慕容小初