美國「中國通」林培瑞早幾日話保安局常任秘書長湯顯明似袁木（六四時話鎮壓只死咗二十三個學生嘅前國務院發言人），湯顯明即日深夜發聲明反駁，反應之迅速、激烈，頗出乎八方意料之外，左報又跟住反攻，連日大鬧林培瑞「人身攻擊」、「詆毀」云云，讀者覺唔覺得有何不妥之處？
重睇唔出？答案就係，竟然左、中、右陣營，無一人為袁木講句好話，湯顯明甚至一口認定林培瑞將佢同袁木比，係差勁嘅批評同攻擊。
薑果然係老嘅辣，林培瑞一句話就令眾人露晒底，原來個個潛意識都覺得袁木唔係好嘢！雖然袁木六四之後官運講唔上亨通，九五年做埋最後一份公職──國家預防和控制愛滋病委員會主任，就離開官場，但畢竟唔同被免職嘅衞生部部長張文康，中央並冇話過佢當日講大話。
呢個故事教訓，每人心中都有一把秤，即使你只係按足政府立場講嘢，如果違背良心同真相，亦可能步袁木後塵，賠上一世名聲。諸位為推銷二十三條無所不用其極嘅高官，你哋明唔明？
不過，八方亦為湯顯明抱不平，點解林培瑞咁睇得起佢，將袁二十三嘅「美名」歸於佢一位？咁董二十三、葉二十三、區二十三……去晒邊？
傳真︰2623-9278
電郵︰