有位緋聞甚少嘅當紅女歌手，早輪佢爸爸生意唔多順利，要周圍撲水，個女歌手雖然搵到錢，但因為做生意要周轉嘅數目唔少，所以佢想幫爹哋，但始終有心無力。有個富豪知道呢件事之後，曾經搵人聯絡女歌手，問佢有冇意思做佢女朋友，如果佢肯答應就幫佢爹哋解決經濟困難。
呢位女歌手一向唔容易向錢低頭，初入行嗰陣已經有富豪用盡方法想利誘佢，但佢好快已經出名，根本唔需要咁樣搵錢。就算今次佢屋企有事，佢一樣冇就範，寧願盡量攞私己錢嚟幫爹哋。雖然佢可能唔係幫到好多，但總算佢有心，希望佢爹哋快啲諗到辦法解決，唔使個孝順女咁擔心。
蔣怡同葉童噚日喺沙田做電影《神探俏嬌娃2指環密令》之「至『俏』嬌娃選舉決賽」嘅評判。問蔣怡嘅評審標準，佢話：「我唔係睇靚唔靚，都唔係睇身材，要自然美。我留意眼神，圈中人我欣賞偉仔（梁朝偉），佢嘅眼神殺死人。我覺得我男友嘅眼神唔迷人，但有自信同有智慧，我當初就係咁俾佢吸引到。」
羅慧娟同媽咪、馬浚偉噚日去咗淘大花園商場出席講座，佢哋以同老人家相處之道做話題，羅慧娟話：「我好錫媽咪，但有時講嘢好難開口，咪惟有用行動表達。媽咪煮嘢食好叻，但佢唔明我哋呢行唔可以咁肥。」不過，羅慧娟𠵱家有纖體公司贊助減肥，就算食幾多都唔使驚啦！
亞視藝員營運、公關及宣傳科總監黎文卓，原來早排向亞視辭咗職，正式離職日期係聽日。馮仁昭噚日打畀阿黎，問佢係咪做得唔開心所以走，阿黎話只係私人理由，始終佢都係鍾意做製作同創作多過做公關，重叫馮仁昭唔好亂估。至於佢未來工作大計，阿黎話會寫書同幫阿燦廖偉雄打理香港嘅「燦師傅」喎！
馬來西亞一個劇團宣布製作一部以張國榮一生為題材嘅舞台劇《LESLIE...THELEGEND今生今世》，喺下個月四號至六號喺大馬公演，到時有五個演員分飾唔同階段嘅張國榮，亦有演員飾演毛舜筠同唐鶴德。劇裏面會唔會有大膽場面？導演李志成話佢哋會將張國榮嘅愛情搬上舞台，大唔大膽就視乎觀眾自己嘅尺度。
