頂樓的林振強拋磚引玉，自度大堆頭反廿三條的橫額，希望讀者踴躍回應。一人一口號，口號百分百原創，真正做到：同心愛香港，七一反廿三！你暫時千頭萬緒，靈感奔騰得太快，未抓得住，不打緊的，大把時間俾你組合，從這一刻起，挖空心思，諗諗點反廿三。
我想假扮遭林振強的磚擊中，馬上人工刺激腎上腺和胰島素（唔知有乜關係，刺了先算），絞盡腦汁度口號。第一句是獻給嫌命長的維園阿伯的，希望他們聽到之後即場嬲到爆缸：「葉劉，你很醜，又不很溫柔」。報上讀到女子在鹿尾巴湯中放安眠藥迷魂情夫後，再用膠紙焗殺對方的新聞，就想到送給湯顯明的口號是：「阿二靚湯，廿三毒湯，你唔係鹿尾巴，點會上當任佢劏！」
董特首不理民意，鬧人膚淺，給他反廿三的口號，不必浪費嘴舌苦口婆心了，似十四K講數才會有效：「你做七十一，我反二十三！」、「我唔行蠱惑，我淨反廿三！吹咩！」或者索性大佢：「反轉豬肚，反廿三反到你向閻王報到！」
梁愛詩講到明，人人頭上一把刀，咁牙煙，反廿三確係刻不容緩，給她的口號是：「唔通留返拜山至反廿三咩！」