上星期鄭大班來電，約往跑馬，大班久唔久就會請一班老友記去快活谷馬場，因為佢少去沙田，而且住響山頂，星期三到快活谷跑夜馬，好方便啫。可惜左丁山比較怕夜，冇應承到，有時都幾服佢，朝頭早四點幾五點就起身，返商台準備做節目，點可以十二點後至上床瞓覺呀，（夜馬十一點散場，返到屋企沖個涼已經十二點）？但第二朝聽佢七點二十分開咪，又唔覺佢冇精神噃，鬧人一樣夠大聲！
可能鬧人太多，就俾別有用心之人整蠱，搞到廣管局要警告佢。廣管局主席馮華健大律師係親董派，做過梁愛詩手下，佢嘅立場係點，大家心照嘞，講多無謂。
大班一怒之下，放吓長假，實行封嘴兩個月，至於兩個月後佢會唔會銷假，成班老友都好關心，驚住佢從此唔玩，打電話嚟叫左丁山勸吓佢。
如果環境唔就，勸都冇用，我哋做傳媒之人（寫稿佬嘅尊稱）應該信奉伏爾泰嘅名言：「我不同意你所言，但我誓死捍護你發言的權利」，馮華健等飽讀詩書，唔知呢句有冇入耳呢？
大班罵人，容或過火，左丁山有時都覺得刺耳，但市場偏好會決定大班罵人言論有冇聽眾，如果冇，商台自會炒佢魷魚，點會畀佢講足幾年，你估何佐芝開善堂乎？既然有市場，又冇違反法律嘅話（佢亦俾人告過），廣管局管佢做乜。照計商台不須擔心收聽率大跌，廣告收入下降的風險，應該好快就求大班復出。