今日係本港足球轉播史上值得紀念嘅日子，因為今晚三色台加埋收費台總共五個台，將會喺凌晨三點同時間播四場波。我求大俠印象中連世界盃都未試過同時間有咁多選擇，波友隨時轉台都轉到手軟，想錄低嘅亦要小心錄錯台至好。
收費台5、6、7同埋18台分別會播兩場洲際國家盃同埋兩場西甲波，另外三色台亦會播西甲皇馬嗰場。數今晚均勢戲碼首推日本對哥倫比亞，但話晒西甲煞科，估計今晚睇西甲嘅人好可能多過洲際國家盃。
講到賭盤，皇馬、皇蘇同巴塞呢啲非勝不可球隊，讓盤讓到相當離譜，信唔信上盤就閣下自理；不過我提醒大家，如果呢邊廂皇馬領先畢爾包好多，嗰邊廂皇蘇唔洩氣至奇，贏唔贏得多呀？
好耐無提過嘅神奇教練米路天奴域，喺前日獲委任為塞爾維亞和黑山國家隊教練。呢位帶領過墨西哥、哥斯達黎加、美國、尼日利亞同埋中國踢世界盃決賽周嘅球壇經典人物，終於鳥倦知還，幫祖國效命。以塞黑嘅人腳、米路嘅領軍能力，我求大俠相信塞黑一定會翻身。
曼聯下個月尾分別會喺美國西雅圖、洛杉磯同紐約等地方比賽，曾經有人擔心碧咸離隊，會削弱佢哋嘅號召力。不過有關方面就證實多場比賽門票早已售罄，而碧咸離隊後暫時只得一宗退飛個案。由此可見，無咗碧咸呢個「品牌」，曼聯一樣受歡迎。
有睇前晚哥倫比亞對新西蘭嘅朋友，應該會為新西蘭龍門歐亭喝采。如果唔係呢位仁兄下半場左撲右撲，新西蘭應該輸得更大鑊。哥倫比亞如果要同日本計得失球爭出線，某程度係輸喺佢手上。哥倫比亞解決入球荒，但射手艾斯迪薩巴射極都唔入，重要加把勁喎老友。
樸茨茅夫領隊哈利列納日前用一百八十萬鎊買入塞黑後衞史堤芬奴域，另外又用五十萬鎊吸納溫布頓中場確加。前者早年喺錫周三證明失敗，而列納重承認知道對方係酒鬼，咁都照簽真係……。佢咁做令我諗起當年佢教韋斯咸亂買好似拉度斯奧同埋富達呢啲蝕本貨，希望列納唔好後悔至好。
利華古遜踢唔到來屆歐冠盃，收入大減，來季想唔瘦身都唔得。會方希望透過賣走法蘭卡、比達錫同埋施夫高域等球員，搵番二千五百萬歐元。之但係呢班球員有價無市，無人問津，呢個如意算盤都難打響。利華古遜今季認真慘，希望後防大將路禾尼來季復出，可以幫隊波重振雄風啦。