中國會老闆鄧永鏘前晚出席其雪茄公司舉行的雪茄宴時，論盡本地演藝界美人。在他眼中，鞏俐、林青霞及鍾楚紅均是絕色美人，但遺憾鍾楚紅不夠高，張曼玉則勝在有味道，他還表示自己重樣貌多於身材，他說：「如果樣醜，身材幾好都冇用啦！」
中國會老闆鄧永鏘旗下的PacificCigar，前晚假金鐘港麗酒店泳池畔舉行雪茄宴，現場並設有游泳比賽，鄧永鏘偕同未婚妻Lucy出席。
向來妙語如珠的鄧老闆，表示已多年沒有在港游泳，因為香港的海灘太骯髒，他還謂年紀漸大，以往追女仔的浪漫招數已甚少出籠，他說：「我試過十幾年前為咗同女友去大浪灣食早餐，要坐直升機去嘅，而負責準備早餐嘅員工都要坐直升機。」
問鄧永鏘其女友當時對於這個安排是否很感動？他說：「係呀，佢感動到攬住啲麵包唔放囉。」
有記者請見盡美女無數的鄧永鏘品評一下演藝界的絕色美人，他說：「喺我嘅審美角度，樣貌係重要過身材嘅，樣醜嘅就算身材幾好都冇用。嗱，鞏俐、林青霞同鍾楚紅都係靚女，可惜鍾楚紅就唔夠高，差咗四吋，而張曼玉就唔算靚女，不過好有味道。」
鄧永鏘更笑言現在年紀大，已甚少睇靚女，而他現時會念詩給未婚妻Lucy聽，十分浪漫，他說：「中英文詩我都念㗎。」
此外，鄧永鏘投資開設的意大利餐廳Cipriani，暫定於九月舉行開幕活動，他說：「等SARS完全減退先搞，到時會請啲皇室人員嚟，同埋會請班意大利肉彈嚟剪綵。」
採訪、攝影：HoWingNing
