剛過去嘅星期一（6月16日），正好係福特汽車成立一百周年紀念嘅大日子，廠方為隆重其事，特別舉辦多項活動以示慶祝，當中包括有最特別嘅ModelT老爺車巡遊、歷代福特及旗下品牌車系展覽、煙花滙演及歌唱表演等等，難怪多日來合共有約226,000名人士，參加是次慶祝活動啦！不如今日一齊嚟重溫一下，部份慶祝活動嘅盛況啦！
記者：鄭達基
若要數最矚目嘅慶祝活動，相信一定非ModelT老爺車巡遊莫屬，多名來自世界各地嘅ModelTFans，聯同超過40部不同年份出廠嘅ModelT老爺車，於5月25日喺美國加州出發，前往位於密歇根州嘅福特汽車總部，為車廠百周年慶祝活動揭開序幕。喺是次巡遊當中，最老嘅參加者為81歲，而最年輕嘅則只有5歲，可謂老中青三代車迷齊集於此，實屬難得；旅程當中，雖然有部份時間下着雨，甚至有車輛因「年紀老邁」，未能應付如此長途旅程而發生故障，但仍無損一眾參加者嘅心情，其後車隊更於6月12日準時到達目的地，參加其他慶祝活動㖭！
而喺慶祝會場內所舉行嘅車展上，亦展出各式各樣嘅汽車，舊至老爺車、新至最新車款，甚至係一啲賣相奇特嘅車種，又或者係拍戲用嘅道具車都有，令在場參觀車迷有目不暇給之感；另外，喺參展車輛當中，重有福特車廠旗下其他品牌嘅車款，如積架、富豪及AstonMartin等等。部份參加美國NASCAR賽事嘅車手，如RickyRudd及MarkMartin等等，亦有到場參加慶祝活動，並為在場嘅Fans簽名留念，因而令場面變得熱鬧起來。
另外，廠方特別於總部大廈外設置100周年紀念燈飾，以表示車廠踏入另一個新紀元，而且重舉行煙花滙演㖭！同時，廠方更安排多位著名歌手如TobyKeith等到場助興，從而令現場氣氛推至另一高峯呢！
福特汽車喺慶祝100周年紀念嘅同時，原來佢哋一位前任員工──SidCurtis，亦會於今個月慶祝佢嘅100歲生辰，絕對稱得上係與車廠共度一個世紀呢！
喺英國倫敦東部出生嘅SidCurtis，1936年便加入福特車廠工作，當時主要係負責製造ModelY及早期嘅Anglias，二次大戰期間佢被調派到車廠旗下其他廠房工作，直至1968年退休為止。不過最有趣嘅係，原來喺SidCurtis嘅家庭入面，其中11名成員都喺福特汽車廠工作，難怪佢哋會話車廠100周年紀念，亦會係佢哋家中嘅盛事之一呢！
於1903年6月16日，亨利福特（HenryFord）與其他11位投資者簽訂合作協議，福特汽車便於此時正式成立，於同年7月20日，福特將第一部生產嘅汽車——ModelA，售予一位居於美國底特律嘅醫生。而備受全球車迷追捧嘅ModelT，則於1908年10月1日推出，此車並遠銷至中國及歐洲等地，截至1927年停產時，共售出約15,458,781部ModelT，打破咗當年汽車銷售紀錄。喺ModelT推出九年後（即1917年），福特更推出ModelTT貨車㖭！
到咗1922年，廠方動用800萬美元（約6,240萬港元）收購林肯（Lincoln）車廠，其後更於1925年喺日本設立汽車生產線㖭！
響1954年推出嘅Thunderbird車系，於短時間內便成為全球車迷追捧對象，風頭可謂一時無兩；其後於1966年，首次踏足利曼24小時耐力賽嘅GT40戰車，包辦咗頭三名位置，頓時令車廠聲名大噪。而廠方於八十年代開始便收購不少車廠，如AstonMartin及積架等等，從而令福特躍升為全球第二大汽車製造商。
但到2001年，廠方錄得虧損多達約429億港元，原有行政總裁被免職，並改由亨利福特後人比爾福特（BillFord）兼任主席及行政總裁，喺佢作出多項節省成本措施後，福特終在今年轉虧為盈，首季已賺咗約70億港元咁多呢！