上個星期講過個隻華豐環保紡織（364）終於喺上星期三公布業績，可能因為之前一個星期已經升咗一成有多，加埋今次派嘅中期息唔多，所以股價一度跌落一個星期前嘅開車位附近。不過上星期五收市時，隻股仔已經爬番上嚟，伏勝問番報料個朋友，佢話之前個批股計劃重會繼續，目標價仍然未改，不妨繼續跟進。隻股仔上周五收市時唔肯再跌，班大戶似乎重未走人，加埋尚未跌穿10日線，伏勝認為不妨睇多一陣。
呢排個市炒得興起，唔單止係因為沙士喺香港已經受到控制，而且重傳緊話有一批國內資金流咗入嚟炒港股，佢哋對於紅嘢特別有興趣，尤其係啲民企股，上星期就有兩日炒到癲晒，全拜佢哋所賜。
除咗中資同民企股有炒作之外，好多原本用開慢火炮製的股仔，近排都好似食咗大補藥咁，其中一隻就係新確科技（1063），隻股分別喺5月同6月公布派發特別股息，又將會投入1000萬元開發新產品，隻股喺唔聲唔聲下已經升咗上嚟。
呢次炒上，好似係同佢哋有新搞作，同埋獲國內大戶垂青有關。據聞有隻春江鴨之前喺低位買咗隻貨之後，就同其他大戶唱要買隻股，其中有個大戶見隻春江鴨一向「料堅價實」，就話要炒起隻股，於是搵咗一班國內朋友，嚟個香港遊之餘，兼且分別係幾間華資大行開戶口，不約而同指定買隻新確科技。傳聞佢哋只不過係先頭部隊，之後重會有批正規軍加入，喺批先頭部隊密密吸貨下，個價已經喺上個星期企喺7毫5左右，睇嚟就快見真章。
伏勝