訪問的原意是跟漫畫家利志達做一個有關插畫和家品的訪問，怎知從一開始便脫了軌，那間與家沒甚分別的辦公室，由一堆堆的CD、VCD、雜誌、畫冊、波鞋、玩具、家品等築成，通屋是寶，害人分神。訪問由他的個人作品開始講到他從網上Bid回來的Designer家品，書本、電影與音樂插科打諢，惟有在不規則中尋回隱藏的點與線。
記者：邵超 攝影：黃子偉
利志達喜歡家品，得閒無事便上網搵料。上網Bid？呻窮的他看多買少。「我買嘢係睇款先，六、七十年代的家具，真係靚啲，設計師反而係其次。大個咗唔可以成日買玩具，好阻碇。成日諗住買家品實際啲，應該會用得着。」利志達最愛買燈，開口閉口都說Lighting好緊要。他極力推介的是已故著名燈飾設計師AchilleCastiglioni，提起他在62年設計的「Arco」極度興奮。他自己都買了一盞Achille的吊燈，外形一流。家中凌亂的布置，赫然發覺燈飾也不少，好奇問他用得完嗎？他大叫：「一間屋要用好多燈，點會用唔晒？」購物毋須合理理由，男女皆如是。
提起有人覺得利志達作品難明，他突然彈出一句：「有時係好難明，腦和手要配合好難。」若非畫公仔畫出腸就等於非主流，那麼利志達是很另類了，就像他極愛的日本大師丸尾末廣一樣。
「丸尾的作品變態少少，到近年至無咁激。最激是《DDT》、《夢之Q-SAKU》和《少女樁》，他畫到嗰種日本二、三十年代樣和服飾，懷舊氣息好濃，故事中的世界好死寂，好灰，我畫唔到。他的Shot好有電影感，唔似大友克洋那種風格，但每格都有啲嘢喎。」欣賞源於自己不能畫出這種風格和震撼。
除丸尾外，利志達亦受大友克洋和望月峰太郎的影響。他購買過的《童夢》，每次借給朋友都有借無還。「第一次睇《童夢》係嚇親，感覺好勁，令我眼界大開，原來畫畫可以咁闊。」相對來說，達哥另一推介的望月峰太郎就較Pop，男女主角極富青春氣息，曾改編成電影，好像型男淺男忠信都演過《鯊皮男與蜜桃女》的電影版男主角。談及近年大熱的幾米，利志達都有留意，拿起一本美國著名童話繪本大師MauriceSendak的名作《野獸國》：「係咪好有幾米Feel呢！」一言驚醒夢中人。