黃霑昨日在中環麗嘉酒店召開記者會，交代有關患上肺癌一事，他表示兩年前傷風感冒看醫生時，發現肺部有陰影，霑叔說：「我當時因為傷風而去睇醫生，咁個醫生就話我食咗咁多年煙不如去照肺，點知一照就發現有陰影，之後再照就知道有個腫瘤。醫生就提議我做手術，跟住就做咗五次化療，我住咗三日就出院啦，其間一啲痛同唔舒服嘅感覺都冇。」
霑叔表示於康復後才告知兒女，他解釋：「因為我唔想咁多人擔心，咁佢哋又唔係醫生，都幫唔到啲乜。但係我老婆就表現得好堅強，佢照顧得我好好，所以我都好佩服佢。其實我戒煙完全唔關肺癌事，我喺戒完後先發現有呢個病。」
問到霑叔在病愈後可有改變人生觀？他說：「𠵱家我學識珍惜生命，因為唔係所有嘢都係必然嘅，對於以前俾我得罪過嘅人，我好希望佢哋可以原諒我。總之我𠵱家嘅生活習慣就係好似一個老和尚咁樣，即係『餓來吃飯，倦來眠』。」事後，霑叔更以過來人身份勸在場各人戒煙。
採訪、攝影：李珮洳