美股周四「三重結算」前回吐，杜指跌1.2%，納指跌1.7%。美股走勢其實令趙飛雲有少少意外，因為近期美股亦係好友惡晒，冇理由最後階段放生對手，唔通留力噚晚再挾上？上次美股「兩期結算」後，杜指隨即在周一大跌185點，唔知今次會否重演上次走勢？
港股噚日走勢則冇意外，美股雖跌幅唔輕，恒指仍係先低後高，早市最多跌過95點，尾市跌幅收窄至49點，收9930，反映好友仍然操控全局。恒指全周埋單升75點，平咗99年10月中開始連升8周的紀錄。不過當時係科技浪大牛市，恒指8周累升4081點，升幅高達33.1%，而今次恒指暫時仍未搵到上升主題。過去8周恒指升1521點，升幅18%，與99年升勢當然不可同日而語，但港股仍未斷纜，下周或可創出9連勝。
以勢論勢，恒指周線圖保持強勢，MACD線升越0線，出現單牛訊號，下個阻力為去年12月頂部10246。
日線圖方面，港股本周升上1萬點後展開整固，走勢近似5月12日恒指升破9200後的走勢，當時好友以9000作底線，如今則似以9800為底線。港股下周預期的利好消息有：（1）SARS疫區除名；（2）CEPA將簽訂；（3）聯儲局月尾估計減息。只是美股不是在三重結算後掉頭大散，好友牌面似係贏晒。
趙飛雲