馮寶寶、盧慶輝同江美儀噚日喺旺角龍飛大廈拍攝亞視劇集《萬家燈火》，劇情講述江美儀喺天台墮樓。
馮寶寶嘅老公噚日都有去探班，佢老公見到記者重係好怕醜，寶寶姐話日內會同老公返大馬，參加個孫嘅生日會，今次返嚟香港拍劇日日都忙住開工，冇時間見啲老友，不過陳寶珠就應承咗遲啲去探佢班，不過馮寶寶話拍完《萬家燈火》之後，一定要去探以前成日同佢合作拍武打片嘅石堅叔。
至於盧慶輝嘅前度女友張慧儀早前疑俾男友打傷，噚日盧慶輝一見記者就話唔好拖佢落水，提起張慧儀就耍手擰頭，不過佢都認為男人打女人係唔啱嘅。
上年開始，吳辰君一直喺內地做嘢，好耐先至返台灣一次，噚日佢喺台灣幫護膚品牌SK-II做宣傳，咁耐冇見台灣傳媒，梗係要扮得靚啲見人，佢話最近趕拍《醉鬼張三》同埋《八卦無敵震中原》兩套電視劇，十月初會同尊龍、周迅合作拍笑片《自娛自樂》，做尊龍情人，令佢好期待。
有周刊報道指鄭希怡（Yumiko）飯局價升咗六倍，有二十萬，佢噚日喺將軍澳電視廣播城綵排「明愛金禧暖萬心」時，話自己最近多是非，佢話：「好笑啊！我唔知自己有價，我覺得自己係無價，我同公司傾過會採取法律行動。」Yumiko重問番記者：「其實係唔係真係有啲咁嘅嘢？」搞到記者都唔知點答佢。
馮仁昭噚日收到一個自稱張慧儀好友嘅圈中人嘅傳真，佢話自己雖然係張慧儀嘅好朋友，但對佢嘅所作所為睇唔過眼。佢聲稱張慧儀份人其實脾氣好暴躁，成日都無理取鬧又唔講道理，而且喺每次嘅聚會度都會同人數以前男朋友嘅是非，張傳真重寫咗好多攻擊同緋謗性嘅言論。馮仁昭都幾懷疑呢個究竟係張慧儀嘅朋友定仇人，點會有人咁數自己老友？
