雖然平日政府好多華而不實嘅政策，俾記者問多兩問，答唔出時都會帶記者「遊花園」，不過噚日上午康文署署長王倩儀帶記者遊花園，就係一番好意，畀機會傳媒同康文署官員一邊行荔枝角公園一邊傾偈，加強雙方溝通。
不過呢番好意竟然一波三折，先係一早陽光猛烈，康文署為記者預備定太陽帽以免曬傷。點知到咗約定時間，老天忽然「變臉」落大雨，一行人惟有改撐傘，雨中漫步公園，欣賞主題為「嶺南之風」嘅荔枝角公園第三期。
離開時天氣又放晴，真係令人哭笑不得。不過此行記者都有唔少收穫，康文署官員對公園一切資料琅琅上口，包括邊度有架滅蚊機、成個公園花費七千萬元等，連藝員蔡少芬同馬浚偉曾經喺公園其中一個景點拍電視劇《洛神》都記得。講講吓，記者重收到料，康文署今日會同警方一齊去深水灣捉垃圾蟲，各位市民小心。
（圖）康文署署長王倩儀（中）呢次帶記者「遊花園」，罕有地受到記者歡迎。
何文雯攝
傳真︰2623-9278
電郵︰