香港只要到周日都係SARS零感染個案，就可以從疫區名單中除名。不過港股噚日跟隨美股回吐，跌49點，收報9930，成交縮至73.6億元。
ｅ莉莎同阿虎講，本港兩大宗教呼籲信眾七一大遊行，到時唔知會否太熱鬧，嚇親來港主持回歸典嘅內地高官，而保安局又唔知會否神經緊張得滯，最終搞串呢個大派對？希望到時大家可以和和氣氣啦。唔少外資亦表示憂慮，有美國芬佬講，白宮高調對香港23條立法發出反對聲明，唔多唔少反映美商對香港回歸後「赤化」的憂慮。不過講真，只要有錢搵，就算係龍潭虎穴，美資都會勇闖，大家唔見有好多外資搞緊QFII進軍中國A股市場咩。
首創置地（2868）噚日曾跌破招股價，低見1.53元，不過，保薦人滙豐證券最後托回招股價1.66元收市，成交2.16億元，承銷商似乎暫時唔想首創低於招股價收市。另一隻新股，中軟國際（8216）噚日掛牌，表現不俗，收報0.42元，較招股價0.32元，高出31.25%，成交1700萬元。黑客叫阿虎有貨好出啦，因為怕成交好快會乾晒。
馬鋼（323）噚日唞氣，獲股神畢菲特垂青的中石油（857）接力搶上。據聞今次唔單止有歐資加入追捧行列，連華資都玩埋一份，股價急升4.65%，收2.25元，成交達3.25億元。
亞太衛星（1045）否認大股東有意收購，股價即刻急挫15.6%，不過成交唔多，只得784萬元。此股周三曾急升50%，成交急增至2866萬元，據聞有對沖基金經過研究，認為此股有條件私有化，於是下注，但由於此股平時成交唔多，所以小量買盤已令股價大升，並傳出大股東擬私有化，傳聞被否認，相信暫時要唞唞。
阿虎