美股周四晚跌114點，港股又係跟唔足，恒指跌49點應酬吓，咁嘅市況揸住恒指Put輪確係好激氣。
近排港股單邊市猛升，最多只係大漲小回，玩恒指Put輪多數輸到眼光光，而且好多短期恒指Put輪已經被廢武功，完全冇值博率。例如早前相當旺場嘅9698，行使價9200，7月30日到期，除非有奇迹出現，否則好難唔變廢紙，槓桿率雖有208.6倍，但溢價高到7.8%，真係讓人九條街，就算俾你買中恒指即日回落百零點，隻輪隨時只係紋風不動或者郁少少，噚日恒指跌49點，9698平收1.7仙，其實已算硬淨。
另一隻近排仍然多人玩嘅同期恒指Put輪9715，行使價9600，溢價4.6%，槓桿率76.9倍。9715數據較9698好好多，但個零月時間有溢價4.6%仍過份偏高，計落唔值博，睇中贏得少，但睇錯輸得甘。
以港股現時趨勢去博Put輪，其實係有少少下風，但手上揸股票多，買些少造對沖亦無可厚非。近期嘅恒指Put輪中較值博只有9712，亦係7月30日到期，行使價10000，溢價2.3%，槓桿率33倍，數據較合理。
噚日恒指跌49點，9712雖然亦有縮溢價，但仍有5.6%升幅，收7.5仙，買咗條氣都叫做順啲。
章盛