春季日劇今個星期就會全部播完，喺下個月就會播新一批劇集，各大電視台都出盡奇招搶觀眾。我羅拉發覺新劇各走極端，有高橋克典主演嘅《特別任命係長．只野仁》玩鹹濕之餘，又有菅野嘅《幸福的王子》扮純情，實行滿足唔同嘅觀眾。
高橋克典喺《特別任命係長．只野仁》入面飾演總務部部長，第一集為咗搶收視，竟然會有呢幕酒池肉林嘅場面，高橋拍完呢場戲都大叫唔捨得。不過，大家唔好以為日本電視尺度咁開放，呢套劇係喺十一點後嘅成人時段播嘅。
呢套《STANDUP！！》可以話我羅拉最期待嘅一套，大家唔好以為我鹹濕，淨係想睇四個處男「發奮」獻出第一次嘅過程，而係呢套劇齊集四大人氣少男偶像二宮和也、成宮寬貴、山下智久同小栗旬，重有有演技嘅鈴木杏。
而第一集就會講二宮喺街飛身執避孕套。夏日炎炎咁多靚仔引你笑，都咪話唔涼透心。
《前男友》嘅主角係堂本剛同廣末涼子，不過佢哋兩個都冇乜睇頭，我羅拉就寧願睇兩個配角SONIM同天野廣之，好搞笑咁談談情跳茶舞啦。
喺《幸福的王子》入面，有兩個演技派影星菅野美穗同本木雅弘扮王子、公主，佢哋繼續玩純過白紙嘅愛情古仔，滿足一啲憧憬浪漫愛情嘅觀眾。