靚女經紀早兩個星期曾經推介元征科技（8196），傳聞公司有意配股。小初諗住可以短炒一轉，點知幾乎摸頂，收尾蝕小小離場。小初冇怪靚女，畢竟日日咁多消息流傳，冇話次次都堅料。
小初噚日先知道，原來靚女上次並無放流料，元征真係公布配股，以每股1.38元至1.43元之間，配售最多8000萬新股，集資額最多1.14億元。
靚女話，元征上次股價由高位回落，可能係傾唔掂價錢，人哋唔想太高價認購新股。
雖然元征係創業板，但業績表現都算唔錯，可作為配售新股嘅賣點之一，其次係公司或者可以在出年轉去主板。
大部份投資者對創業板股有戒心，不過亦有極少數公司為芬佬受落，好似同仁堂科技（8069）就係由少數芬佬揸晒，所以股價先至咁硬淨。
以往有幾個轉主板嘅例子，轉咗板後亦唔見成交變得活躍。元征若真有此打算，可能係對未來業績十分有信心。
慕容小初