要數今年香港最「潮爆」的打扮，當然首推充滿美國黑人文化的HipHoplook，明星界由劉德華、陳小春、周杰倫、張栢芝，甚至「儍強」杜汶澤都是HipHop信徒，香港籃球圈「至潮」球員香振強亦都是HipHop佼佼者，今期《SummerFun》就等阿香教大家玩HipHoplook，「型震」全港。 文：盧漢傑 圖：黃冠華
已玩了HipHoplook四年的阿香，是因為NBA76人隊球星艾華遜而接觸HipHop，他說：「我好欣賞艾華遜，佢身材喺NBA屬於超矮一族，但都可以成為得分王，技術固然不用懷疑；我最欣賞他打不死的鬥志，慢慢由欣賞他的打法，到跟隨他的打扮，我都有收藏艾華遜的Rap唱片，之後識到好多朋友都玩HipHop，一齊去HipHop派對。不過我無繪畫天份，所以HipHop一大元素-graffiti（塗鴉）就唔啱我，至於用喺打扮方面，一個月都會用成一、二千蚊㗎。」
阿香早在上年七月就已經大玩「寶黛麗」辮子頭，比足球明星碧咸玩先足足早大前年，上年十一月，更以一頭「大爆炸頭」參戰大專盃，震撼全場。阿香說：「其實都係有朋友做髮型師，我先至敢玩得咁激，辮子頭其實好麻煩，好易散，又唔可以日日洗頭；爆炸頭就係跟活塞中鋒賓華萊士去整，出街就梗係型到爆，不過打波時會好焗，到夏天都係剪番短。」
髮型現已歸於平淡的阿香，就推介「光頭」look為今夏大熱，他說：「今年會興光頭look，不過我面形唔襯，都係保持短頭髮好啲。」
籃球同HipHop可說一脈相承，特別係NBA，固穿上闊身NBA波衫襯三個骨牛仔褲或板仔褲，加對籃球鞋或板仔鞋，已經夠HipHop，阿香說：「今年興HipHop加oldschoollook，好似NBA好多球隊都推出復刻版波衫，或者NCAA（美國大學籃球）波衫就更加in，記住重要買大一個碼扮over-size。」
除籃球look外，阿香推介沙灘look，就係格仔短袖恤衫或夏威夷恤，加沙灘褲同涼鞋，輕便之餘又夠in。
HipHop另一精髓就係極多裝飾，由紋身，到耳環、鼻環、肚臍環，到幾斤重的金頸鏈銀頸鏈，有咁誇張得咁誇張，阿香說：「HipHop文化很大程度跟黑社會有關連，所以講求『晒碼頭』，不過我就只接受到穿耳環；其實之前都有諗過紋身，不過擔心以後搵唔到工，所以放棄紋身。」收藏二十多條頸鏈的阿香，至愛裝飾就係價值四萬以上的勞力士地東拿手表，阿香說：「有呢隻表做碼頭，肯定殺晒。」
香振強（Mike）
年齡：21
身高：1米74
體重：70公斤
位置：控球後衞
效力球隊：永倫
